ฮักผญา ฮักผญา.. เด้อค่ะ.. เด้อ...ร่วม..สืบสานมรดกอีสาน
ดอกสะแบงบานเทิงต้น ดอกติ้วหม่นเทิงโพนเถียง
ฟังสำเนียงเสียงแคน กล่อมคูณอยู่เทิงต้น
คนเอ้ยคนผู้ไกลบ้าน แคนหวานหวานมาต้อนสู่
ฝากสำเนียงมากล่าวฮ้อง เป็นแฮงสู้ ต่อฝัน
ชาวอิสานทุกทุกท่าน สุขสำราญกันดีบ่
เสียงแคนน้อมาส่งให้ แรงใจเจ้า ผู้ซุคน พี่น้องเอย
>>>F/B สมาคมคนฮักผญาบ่าวคนไกล ผญาหย่อย
อรุณสวัสดิ์ยามเช้า ชาวอิสานน้องพี่
อรุณนภาส่องซี้ เป็นศรีมื้อแจ่มใส
ดวงฤทัยใสแจ้ง แสงธรรมส่องทองประกาย
ถวายอาหารทำทาน ส่องบุญพุทโธเจ้า
นำฮอยเฮาอิสานบ้าน เพิ่นทำทานแต่ครั้งเก่า
ลูกหลานเฮาสืบต่อไว้ อย่าไลถิ่มหน่อพุทโธ
>>>F/B บ่าวคนไกล ผญาหย่อย/15 มีนาคม 56
สูริโยโผล่ฟ้า อรุณเบิกบายศรี
จิตคิดดีเป็นทาน ก่อเตาหุงต้ม
สั่งสมบุญหนุนไว้ เป็นทุนภายภาค
ยามได้มุดมอดเมื้ยน พอได้เพิ่งพา
ตายายพ้อม รอเพิ่งอาศัย
ผู้เพิ่นไปไลลา ได้อยู่กินทานเจ้า
มีเพียงข้าว ทำทานหนุนส่ง
จิตแจ่มแล้ว คือแก้วหน่วยมณี
>>>F/B บ่าวคนไกล ผญาหย่อย/15 มีนาคม 56
พี่น้องเอ้ยย…..
อรุณนภาฟ้ามืด เมฆาบังฝนตั้งท่า
คือสัญญาณบอกว่า คุณพระมาซ่อยค้ำ นำชี้มาส่องทาง
บ่าวคนไกล หน้าบ่ทันฮอดได้ล้าง คือมีลางมาบอกกล่าว
ให้ฟ้าวมาเร่งจ้าว อย่ามัวเศร่าเน่าใน
ออนไลน์มาเปิดได้ เห็นเพจใหม่มาเทียมสอง
เพจสมาคมกะมาฮอง อยู่สองมาเคียงซ้อน
ดีใจหลายจนกายฮ้อน คือดั่งพรพระธรรมส่ง
บุญทานทำมาส่งยู้ ให้ซูค้ำ ต่อผญา..ผูข่า เอย
>>>F/B บ่าวคนไกล ผญาหย่อย/16 มีนาคม 56
เอาศีลธรรมเคียนคล้อง ในใจหุ้มห่อ
สุขฤทัยแช่มช้อย มโนน้อยซุ่มเย็น
ฮอดวันพระละเว้น ความโลภโกรธหลง
ค่อยค่อยปลงละวาง ส่องทางพุทโธเจ้า
มโนเฮาสิสุขยิ่ง เป็นจริงคือคำว่า
สุขในโลกากว้าง สังสิสู่หน่วยฤทัย..ใสเลิงๆ เอย
//บ่าวคนไกล 10 เมษายน 56
>>> F/B สมาคมคนฮักผญา
สงกรานต์เนาว์เดือนห้า เมษากะใกล้ม่อ
ประเพณีเก่าบ้าน สรงน้ำให้ซุ่มเย็น
ตกยามแลงเย็นย่ำ สรงน้ำพระอารามหลวง
พ่อแม่เฮาพาทำ แต่เก่าหลังคราวกี้
ตกสมัยซุมื้อนี้ สิมีมาบ่น้อท่าน
สรงน้ำพระแบบเก่าบ้าน อีสานพุ้นแต่เก่ามา
ยุคสมัยมันก้าวหน้า แก้ผ้าแข่งโชว์องค์
นวลอนงค์บ่มามอง ส่องประเพณีบ้าน
สงกรานต์เนาว์เลยพานส่วย โชว์ความสวยขันแข่ง
สรงน้ำผู้เฒ่า บ่มาแงง พรเพิ่นจาว่าให้ สังสิได้ รับพร..นางเอย
>>> F/B ลำนำ อีสาน / 9 เมษายน 56
เกิดเป็นคนควรตอกย้ำ เซ้าค่ำให้มีศีล
ใจเป็นบุญสุนทาน ต่อคำพุทโธเจ้า
ความระกำเหงาเศร่า สิพาเฮาให้เห็นป่อง
ท่องทางธรรมละเว้น เข็ญฮ้ายให้หน่ายหนี
คนในโลกานี้ ย่อมมีทุกข์สุขผสม
เอาศีลธรรมมาประโลม ข่มใจให้หายฮ้อน
สิ่งบั่นทอนจิตใจฮ้าย สิหนีไกลหลีกห่าง
หันมาฟังธรรมมะเจ้า ลำนำเว่ากล่าวผญา พี่น้องเอย
>>>F/B บ่าวคนไกล ผญาหย่อย/15 มีนาคม 56
คุณข้าวแดงแกงฮ้อน โบราณเพิ่นสอนสั่ง
เพียงข้าวสุกหนึ่งครั้ง คุณยั้งค่าอนันต์
กินบนเรือนเพิ่นว่านั่น อย่าหาญขี่ใส่เทิงหลังคา
มันสิพาเฮาทุกข์ บาปเข็ญแม่เวรต้อง
ได้ซุกหัวนอนอยู่ในห่อง วังทองของขุนใหญ่
บ่ลืมบุญคุณระลึกไว้ สิใสเหลี่ยมฮ่อมเจริญ..ท่านเอย
//คนไค ไทสารคาม/6 พฤษภาคม 56
ฝนลงโฮยฮำพื้น ผืนนา เขียวชะอุ่ม
ดินอีสานเขตแล้ง ที่เคยแห่งกะเปลี่ยนสี
บรรดาพื้นพันธ์กะป่งชี้ แทงยอดออกใบ
พอได้เก็บเหน็บใน ใส่ดินไว้กินค้าง
ฝูงปูปลาเคยลาร้าง สัญจรจากหนองใหญ่
ออกหาไข่ใส่น้ำ ยามฝนล้น หลั่งลง
ฝนตกมาในนาห่ง บ่อึดกินในดินท่ง
แดนอีสานนี่ยังคง บ่อนดำรงชีวิตไว้ บ่อึดใช้ให้อยู่กิน..พี้แหล้ว
>>>F/B สมาคมคนฮักผญา/บ่าวคนไกล ผญาหย่อย
โอ้ย น้อ ว่าแม่เอ้ย
ว่าศรีๆ สู่ขวัญเอิ้น ทุกทางเดินที่ลูกหย่าง
เฮ็ดการใดที่ใจหวัง กะให้มาคูณมาค้ำ
สุดแผ่นดิน แผ่นน้ำ ที่เหยียบย่ำ ตามฮอยฝัน
อย่าให้มีภัยพาล พบสิ่งดีทุกแดนด้าว
ตะเว็นหนาว ดาวฮ้อน ความอาทร กะยังอุ่น
กะยังอุ่น เหมือนแววตา ดอกอาดูร
ส่องมองมา ทุกเส้นทาง ลูกจร
.. ..
ขอบคุณเพลง คิดฮอดฮักแท้ ของอ้ายไผ่เด้อจ้า
>>> F/B เสียงแคน ฟากท่ง/6 พฤษภาคม 56>>> F/B Yanyong Pengchaimo
ผักสวนครัวรั้วกินได่ ปลูกใว่ขายพอได่อยู่
เก็บใว่เลี้ยงหลานคู่ ดูแลมาแต่น้อยน้อย
กำพลอยหล่าถ่าแม่มัน ไปหากินอยู่บ่อนบั้น
ทางเมืองไทห่างไกลถิ่น ทุกเซ่าแลงแฮ่งได่ยิน
อยากกินหนมจ่มทุกมื้อ พอได่ยื้อดอกอยู่นำ คำแพงเอ้ย
//Anchalita Siri-Arpa
